Kynningarmyndband um Smyrlaheiði, Hveragerði

Fréttir og fréttamolar

Hér fyrir neðan eru nokkrar fréttir af starfsemi Búmanna. Hægt er að nálgast síðasta fréttabréf Búmanna í heild sinni á síðunni Skjöl.

_______________________________________________________________________________________

Mánaðargjöld Búmanna !!

Vegna greiðslujöfnunar lána Búmanna þá fylgja lánin nú greiðslujöfnunarvísitölu í stað neysluvísitölu. Undanfarna mánuði hefur greiðslujöfnunarvísitala breyst lítið. Nú ber hins vegar til að hún hækkar úr 97,6 stigum í júlí  í 101 stig í september. Af þessum orsökum hækkar sá liður mánaðargjaldanna sem kallast afborgun lána nokkuð.

________________________________________________________________________________________

11. Aðalfundur Búmanna

Aðalfundur Búmanna haldinn á Grand Hótel Reykjavík miðvikudaginn 9. júní 2010 kl. 17.00. (Fundur var auglýstur þriðjudaginn 25. maí í Fréttablaðinu og  Mbl.)

Ávarp fundarins:

Ingibjörg Bernhöft, hjúkrunarfræðingur flutti stutt erindi. Fyrir þá sem ekki þekkja Ingibjörgu þá er hún forstöðumaður Droplaugastaða. Ingibjörg hefur kynnt sér búsetuúrræði eldra fólks mjög vel í ýmsum löndum og hefur mótaðar skoðanir á því hvernig umgjörð heimila fyrir eldra fólk eigi að vera þannig að fólkinu líði vel.

Skýrsla stjórnar fyrir liðið starfsár.

Á starfsárinu júní 2009 - júní 2010 var stjórn félagsins þannig skipuð: Guðrún Jónsdóttir formaður, Steinunn Finnbogadóttir, varaformaður. Aðrir stjórnarmenn voru Steinar Júlíusson, Úlfur Sigurmundsson og Sigurveig Sigurðardóttir. Varamenn voru Ásgeir Hjálmarsson, Eyrún Eiríksdóttir, Helgi Baldursson. Skoðunarmenn félagsins voru: Ármann Pétursson og Sigurður Þórhallsson og skoðunarmenn til vara voru Sigurður Walters og Emil Gunnar Guðmundsson. Stjórnin hélt 22 bókaðan fund á starfsárinu auk fjölda vinnufunda og óformlegra smærri funda.

Starfsmannamál.

Sú breyting varð á að Einar Birgisson lét af störfum hjá félaginu undir lok síðasta árs.  Hjá félaginu starfa nú þau Daníel Hafsteinsson, Guðmundur Guðbjartsson, Lára Guðmundsdóttir og Þorgrímur Stefánsson.

Félagsdeildir Búmanna.

Um síðustu áramót voru rúmlega 2.200 félagsmenn í Búmönnum en þá voru félagsnúmer komin í 4595. En eins og kunnugt er þá falla þau númer dauð niður þegar félagsmenn hætta í félaginu eða ef þeir falla frá.

Búmenn eru deildaskipt félag og eru nú starfandi 10 félagsdeildir og tilheyra í dag rúmlega 90% félagsmanna einhverri af þessum deildum.

Reykjavíkurdeildin er stærsta deildin með 749 félaga. Næst kemur Suðurnesjadeild með 387 félagsmenn, Eyjafjarðardeild með 215 félagsmenn  og Kópavogsdeild  með 205 félagsmenn.

Byggingaáætlun.

Félagið hefur frá upphafi lagt fram byggingaráætlun, sem hefur verið grunnur að lánsumsókn til Íbúðarlánasjóðs. Bygingaráætlunin hefur verið endurskoðuð 

á hverju ári og er nú gert ráð fyrir  að fyrir árslok 2010 verði fjöldi íbúða í eigu Búmanna um 540 talsins. Um síðustu áramót höfðu 532 íbúðir verið teknar í notkun í 13 sveitarfélögum, en vegna ástandsins í þjóðfélaginu er nokkur óvissa um uppbyggingu íbúða á vegum félagsins á næstu misserum. Ég mun hins vegar koma betur inn á þau mál í ræðu minni hér á eftir.

Á milli ára fjölgaði íbúðum úr 514 í 532 og bættust því einungis 18 íbúðir við á árinu 2009 sem er sennileg minnst fjölgun íbúða á vegum félagsins frá upphafi.

Kreppa á íbúðamarkaði.

Sú staða hefur skapast á íbúðamarkaðnum að sjaldan hefur verið dýrara að standa að byggingu íbúða um leið og íbúðaverð hefur verið að falla. Þessi þrónum hefur skapast vegna þess að öll aðföng frá útlöndum hafa hækkað í samræmi við veikingu krónunnar um leið og mikið framboð á íbúðamarkaði og mikið atvinnuleysi  hefur valdið lækkun á verði íbúða. Lýsa má ástandinu mjög gróft með því að segja að kostnaðarverð á hvern fermetra íbúðar nálgist kr. 300.000 á meðan söluverð sé um 200.000.

Vegna þessa ástands hafa Búmenn leitast við að ná samstarfi við Íbúðalánasjóð og bankana. Þessir aðilar hafa orðið að leysa til sín mikið magn íbúða. Búmenn hafa boðist til að koma að markaðssetningu íbúða ef samningar takast um verð. Samstarfið verður að byggir á því að ef Búmenn selja búseturétt þá fær félagið lán hjá Íbúðalánasjóði og Búmenn geta gert upp við viðkomandi fjármálastofnun. Segja má að Búmenn taki enga eða mjög takmarkaða áhættu með þessari aðferðafræði.

Samhliða þessu höfum við reynt að fá viðkomandi banka til að bjóða lán til kaupa á búseturétti vegna þess að margir eiga erfitt með að kaupa búseturétt nema að selja íbúð sína fyrst.

Búseturéttarfyrirkomulagið sem úrræði til þeirra sem eru að missa íbúðir sínar.

Félagsmálaráðuneytið og Íbúðalánasjóður hafa kynnt að þeir sem eru að missa íbúðir sínar vegna erfiðleika verði gefinn kostur á að sitja áfram í íbúðunum þrátt fyrir að viðkomandi aðilar hafi misst eignarhald þeirra á uppboði. Fram hefur komið í fjölmiðlum að þeir sem eru að missa íbúðirnar geti fengið að leigja íbúðirnar af Íbúðalánasjóði tímabundið og einnig komi til greina að viðkomandi verði boðið upp á kaupleigu og er þá gert ráð fyrir því að leigjendurnir greiði 30% álag á húsaleiguna.

Búmenn hafa lagt fram hugmyndir um að þriðja leiðin verði í boði þ.e. að þessum aðilum verði boðið að breyta íbúðunum í búseturéttaríbúðir. Þetta færi þá þannig fram að Búmönnum verði gert kleift að fá 100% lán til kaupa á viðkomandi íbúð sem t.d. Íbúðalánasjóður hefur leist til sín og verð íbúðarinnar taki mið að markaðsverði. Lánið verði í raun tvískipt þ.e. 90% og 10%. Tíu prósent hlutinn komi til uppgjörs að ákveðnum tíma liðnum, t.d. eftir 5 ár. Endanlegt uppgjörið á búseturéttinum fer fram við sölu á búseturéttinum eða með kaupum viðkomandi búseturétthafa á honum. Við uppgjörið greiðist 10% hluti lánsins til baka til Íbúðalánasjóðs. Fyrirkomulagið byggir á því að viðkomandi aðili gerir samkomulag um kaup á  svokölluðum duldum búseturétti sem viðkomandi þarf ekki að greiða strax enda ekki kaupgeta til staðar nú.

Lausar íbúðir Búmanna

Við hrunið kom á markaðinn mikill fjöldi íbúða sem eru í eigu ýmissa byggingaraðila og banka sem boðnar eru á niðurgreiddu verði þar til markaðurinn réttir úr sér aftur. Það þarf ekki að taka það fram að þeir sem búa í íbúðum félagsins eru í eldri kantinum. Þeir sem hafa verið að skila inn íbúðum hafa í flestum tilfellum verið að færa sig yfir í meiri þjónustu, oftast á hjúkrunarheimili. Það hefur verið erfitt að losna við þá búseturétti sem hafa verið til sölumeðferðar hjá félaginu, einkum vegna þess að flestir þeirra sem áhuga hafa, þurfa að selja íbúð til að geta keypt hjá Búmönnum.  Einnig kemur það Búmönnum í koll nú að félagið hefur boðið fólki að kaupa 30% búseturétt sem í dag getur kostað 8-9 millj. með verðbótum. En á móti kemur að ódýrara er að búa í þessum íbúðum.

Greiðslujöfnun lána.

Þegar félagsmálaráðuneytið hóf umræðu um greiðslujöfnun lána höfðu Búmenn samband við ráðuneytið og óskuðu eftir því að fyrirhugaðar reglur um lækkun á greiðslubyrði lána næðu einnig til þeirra sem búa í íbúðum félagsins. Eftir nokkrar viðræður við ráðuneytið og Íbúðalánasjóð var samþykkt að verða við því. Öll lán Búmanna eru því með greiðslujöfnun í dag.

Greiðslujöfnun hefur bæði kosti og galla. Greitt verður samkvæmt greiðslujöfnunarvísitölu en lánin fylgja áfram neysluvísitölu. Í grundvallaratriðum er verið að færa greiðslubyrði lána frá nútímanum til framtíðar. Verið er að létta greiðslubyrðina nú og næstu misseri vegna erfiðs ástands í þjóðfélaginu.

Í raun er ákveðinni fjárhæð mánaðargjaldanna frestað til seinni tíma og mun Íbúðalánasjóður halda utan um þessa fjárhæð á sérstökum greiðslujöfnunarreikningi sem tengist hverju og einu láni. Þegar launakjör og atvinnustig fer aftur upp, þá hækkar greiðslujöfnunarvísitalan, og þá hækka afborganir lána aftur.  Með hækkandi greiðslujöfnunarvísitölu fer fólk að greiða niður það sem safnast hefur inn á greiðslujöfnunarreikninginn. Við hækkandi greiðslujöfnunarvísitölu er fólk væntanlega betur í stakk búið til að greiða meira vegna þess að kaupmáttur hefur aukist aftur.

Eitt af markmiðum Búmanna hefur verið að reyna að lágmarka húsnæðiskostnað íbúa til lengri- og skemmri tíma. Þetta hefur m.a. verið gert með því að öll lán félagsins  eru tekin til eins langs tíma og mögulegt er, eða til 50 ára. Fyrir búseturétthafa Búmanna sem flestir eru komnir vel yfir fimmtugt er það meira atriði að hafa þægileg mánaðargjöld heldur en að lánin greiðist fyrr niður. Almenningi gefst að hámarki kostur á því að taka lán til 40 ára.

Yfirlýsing rísstjórnar frá 17. mars 2010.

Í yfirlýsingunni um aðgerðir í skuldamálum og húsnæðismálum eru gefin fyrirheit um eflingu búseturéttarkerfisins á Íslandi. Um það segir í yfirlýsingu stjórnvalda: “Sérstök áhersla er lögð á að efla varanlega leigu- og búseturéttarkosti og gera þau að raunhæfum langtímavalkosti við séreignarformið.”

“Meðal atriða sem litið hefur verið til við mótun stefnunnar eru; Stóreflt búseturéttarkerfi: Lögum um húsnæðissamvinnufélög verði breytt og félögunum gert kleift að bjóða upp á hagstæðan og öruggan húsnæðiskost fyrir einstaklinga og fjölskyldur sem vilja hvorki leigja né eiga.”

Búmenn hafa unnið tillögur sem komið hefur verið á framfæri við félagsmálaráðherra þar sem vakin er athygli á því að með tiltölulega einföldum breytingum á vinnureglum hjá Íbúðalánasjóði og með reglugerðarbreytingum mætti styrkja stöðu húsnæðissamvinnufélaganna.

Vakin er athygli á því að þótt að húsnæðissamvinnufélögin sem boðið hafa upp á búseturéttarformið hafi staðið sig afar vel í rekstri og uppbyggingu búseturéttarkerfisins, þá hafa efnahagsörðuleikar sem Íslendingar glíma nú við sett mark á rekstur þeirra eins og annarra.

Óskað hefur verið eftir því að húsnæðissamvinnufélögunum verði gefin kostur á því að frysta lán á auðum íbúðum án þess að það hafi áhrif á lánveitingar til félaganna. Hér er um að ræða breytingu á vinnureglum íbúðalánasjóðs.

Íbúðalánasjóði verði gefin kostur á því að lána húsnæðissamvinnufélögum fyrir búseturétti sem þeim bera að innleysa vegna kaupskylduákvæða.

Að lánshlutfall til húsnæðissamvinnufélaga vegna búseturéttaríbúða verði aftur 90% í stað 80% eins og nú er. Þessar tvær breytingar krefjast reglugerðabreytinga.

Vonir stóðu til að þessar tillögur náðu fram að ganga á vorþinginu enda er orðið mjög íþyngjandi fyrir félagið að fjármagna kaup á búseturétti sem félagið hefur þurft að innleysa vegna kaupskyldunnar.

Það má segja að vegna erfiðs ástands sé álag á félagið margþætt. Vanskil félagsmanna aukast. Félagið þarf að greiða af auðum íbúðum í sex mánuði frá uppsögn í kaupskyldukerfinu.

Búmenn þurfa að greiða búseturéttinn út tólf mánuðum frá uppsögn og getur þetta verið umtalverðar fjárhæðir og segir sig sjálft að félagið hefur ekki endalausa getu til að standa undir slíku.

Samstarf Búmanna og Sveitarfélagsins Álftaness.

Í júní 2006 leituðu bæjaryfirvöld í Álftanesi eftir samstarfi við Búmenn um uppbyggingu í sveitarfélaginu. Ný bæjarstjórn hafði látið gera úttekt á Búmönnum og nokkrum öðrum aðilum sem starfa á þessum íbúða markaði og var niðurstaðan sú að Búmenn voru hagstæðastir.

Á þessum tíma hafði sveitarfálagið uppi áform um að fara í arkitektasamkeppni varðandi deiliskipulag á svokölluðu miðsvæði sveitarfélagsins. Bæjarfélagið hafði áhuga á að fá Búmenn að uppbyggingu þjónustumiðstöðvar fyrir eldra fólk í sveitarfélaginu ásamt íbúðum í beinni tengingu og í næsta nágrenni við þjónustumiðstöðina.

Við hönnun þjónustumiðstöðvarinnar var tekið mið af því að íbúafjöldi sveitarfélagsins tvöfaldaðist á ákveðnu tímabili og var reiknað með því að nýta húsið undir aðra starfsemi að hluta þar til full þörf væri fyrir allt húsið undir starfsemi eldriborgara í sveitarfélaginu.

Þann 4. júní 2009 var gengið frá undirritun samninga. Við það tækifæri var undirritaður rammasamningur milli Búmanna, sveitarfélagsins og byggingarverktakanum Ris-Álftanes sem annast skildi um byggingu húsanna fyrir Búmenn. Forsenda fyrir undirritun samninganna var sérstök úttekt sem sveitarfélagið lét framkvæma um áhrif samningsins milli Búmanna og sveitarfélagsins á efnahag sveitarfélagsins. Niðurstaða skýrslunnar var að sveitarfélagið hefði fjárhagslega burði til að fara í verkefnið. Skýrslan var unnin af ráðgjafafyrirtækinu  Par-X og skilað 10. maí 2009.

Um haustið 2009 féll meirihluti Álftaneshreyfingarinnar og við tók meirihluti sjálfstæðismanna ásamt einum fyrrum fulltrúa Álftaneshreyfingarinnar. Nýr meirihluti kallaði til Eftirlitsnefnd með fjármálum sveitarfélaga sem lét gera nýja úttekt á stöðu sveitarfélagsins. Ný skýrsla var unnin af R3-ráðgjöfum  sem skilað var 7. desember 2009. Niðurstaða þessarar skýrslu var að sveitarfélagið væri komið í greiðsluþrot.

Eftirlitsnefnd með fjármálum sveitarfélaga lagði til að ráðuneytin skipuðu sveitarfélaginu fjárhaldsstjórn og var það gert.

Búmenn hafa lágt á það áherslu að ef það verður niðurstaða fjárhaldsstjórnar að stöðva verkið þurfi að gera upp þann kostnað sem Búmann hafa lagt í verkið. Þess má geta að í áðurnefndum rammasamningi eru einmitt ákvæði um það hvernig beri að bregðast við ef einn að þessum þremur samningsaðilum lendir í ógöngum og getur ekki staðið við sitt. Í samningnum er alveg skírt að sá aðili sem veldur tjóninu ber að bæta hinum það tjón sem þeir verða fyrir.

Í þessu máli er það Sveitarfélagið Álftanes sem er komið í ógöngur og er að valda Búmönnum og Ris tjóni.

Það er sannfæring Búmanna að sama hvaða leið verði valin þá verði hún að byggja á þríhliða samkomulagi aðila en ekki nauðarsamningum.

Smyrlaheiði í Hveragerði

Nokkrar tafir urðu á því að Búmenn gætu tekið við þriðja áfanga íbúða félagsins við Smyrlaheiði sem eru samtals 8 íbúðir. Dráttur varð á afhendingu íbúðanna og síðan varð töf á uppgjöri vegna þess að Íbúðalánasjóður taldi að eiginfjárstaða Búmanna væri of lág skv. vinnureglum sjóðsins.

Aðalástæða þess að eigið fé svona félaga fer minnkandi er að íbúðaverð heldur ekki í við verðbólgu. Verðbólgan heldur sínu striki en íbúðaverð lækkar. Auðvitað er þetta allt saman reikningslegt og með tíð og tím fer íbúðaverð upp aftur.

Verk í undirbúningi

Það verður að segjast að vegna ástandsins í þjóðfélaginu hefur ekki gengið vel að koma málum áfram sem voru komin vel á rekspöl fyrir hrun. Samt er ástæða til að nefna þau mál sem voru komin vel á veg þegar hrunið varð.

Búmenn hafa komið að vinnu við skipulag á Akureyri á reit fyrir um 30 íbúðir í sérbýli við Krossanesbraut.

Einnig hefur verið unnið við skipulagi á reit við Víðihlíð í Grindavík þar sem áætlað er að hægt verði að byggja um 40 íbúðir og er gert ráð fyrir þjónustumiðstöð fyrir eldriborgara í því skipulagi.

Búmenn hafa einnig unnið með Kaþólsku kirkjunni sem á lóð við Jófríðarstaði í Hafnafirði að frumtillögum að þjónustumiðstöð og íbúðum.

Einnig hafa Búmenn komið að skipulagi á reit við dvalarheimilið Kirkjuhvol á Hvolsvelli.

Góðir fundargestir. Eitt af grundvallaratriðum þess að félag eins og Búmenn nái að eflast og dafna er að stjórn þess sé samhent og  geti unnið saman af einurð og fullum heilindum. Það hefur  þessi stjórn gert og vil ég þakka meðstjórnendum mínum og starfsmönnum félagsins fyrir afar gott samstarf á liðnu ári og vonast til að geta starfað áfram með ykkur.

Ennfremur vil ég þakka ykkur öllum félagar góðir fyrir samstarfið á liðnu ári.

__________________________________________________________________________________________

Skýrsla Viðhaldsráðs Búmanna fyrir starfsárið 2009.

Flutt af framkvæmdastjóra félagsins.

Um síðustu áramót voru kr. 134.2 millj.  í viðhaldssjóðum Búmanna. Á árinu 2009 voru greiddar kr. 32.1 millj. úr viðhaldssjóðum félagsins. Greiddar voru kr. 33.3 millj. inn í sjóðina 2009.

Viðhaldssjóðirnir eru vistaðir á svokölluðum markaðsreikningum bankanna. Meðal ávöxtun sjóðanna var um 9,25% á árinu 2009. Eins og flestir vita hefur verið hægt að fá endurgreiddan hluta af virðisaukaskatti af vinnu á verkstað. Í mars 2009 fór þetta hlutfall úr því að vera 60% í 100%. Taka skal fram að það getur tekið nokkuð langan tíma að sækja endurgreiddan virðisaukaskatt og geta endurgreiðslurnar færst á milli ára vegna þess þessa.

Raðið stóð að því að Björn Marteinsson sem er aðal fræðimaður Rannsóknastofnunar byggingariðnaðarins um viðhaldsmál var fenginn til að flytja erindi um viðhaldsmál á fundi með formönnum og viðhaldsfulltrúum Búmanna 21. apríl 2009.

Ráðið útbjó og lagði fram drög að verklagsreglum við kaup á íbúðum Búmanna. Hér er um að ræða drög að reglum sem félagið getur notar til að reyna að hafa áhrif á viðhaldskostnað framtíðarinnar með markvissum vinnubrögðum og kröfum til þeirra sem selja Búmönnum íbúðir í framtíðinni.

Viðhaldsráðið hefur lagt til við stjórn Búmanna að vegna ástandsins í þjóðfélaginu verði framlagið óbreytt og hefur stjórn Búmanna fallist á það.

Viðhaldsráð leggur til að viðhaldsprósenta verði sú sama frá næstu áramótum og samþykkt var á aðalfundi Búmanna 11. júní 2008, þ.e:

Lágmarksgjald í viðhaldssjóð verði 0,5% af brúnabótamati íbúðar þar til lágmarksfjárhæð á hverja íbúð í viðkomandi búsetufélagi nær kr. 150.000.-

Eftir að þessari fjárhæð er náð þ.e. 150.000.- getur greiðsla í viðhaldssjóð lækkað niður í 0,35% af brunabótamati íbúðar.

Allar íbúðir Búmanna hafa náð þessari prósentu í dag.

Þetta mun vera þriðja árið í röð þar sem framlagið í viðhaldssjóð hefur ekki verið hækkað. Þá erum við að tala um rukkað er sömu krónutölu og ekki hefur verið leiðrétt fyrir verðbólgu og hefur framlagið því rýrnað. Viðhaldsráðið telur að þetta sé réttlætanleg vegna ástandsins í þjóðfélaginu.

Fulltrúar í viðhaldsráði Búmanna:

Magnús Stephensen, form., Garðar Einarsson og Gunnar Steinþórsson voru fulltrúar í viðhaldsráði.

Viðhaldsráð Búmanna skal kjósa til þriggja ára í senn.  Tveir fulltrúar í ráðinu þeir Magnús Stephensen og Garðar Einarsson voru kjörnir á aðalfundi félagsins 2007.  Magnús hefur ákveðið að gefa ekki kost á sér áfram. En Garðar gefur kost á sér áfram og er því í kjöri nú. Gunnar Steinþórsson var kjörinn 2008 og verður því næst í kjöri 2011. Stefán Jónasson hefur ákveðið að gefa kost á sér sem þriðji maður í ráðinu. Stefán sem er menntaður málarameistari býr við Grænlandsleið og hefur umsjón með viðhaldsmálum hjá Félagsbústöðum. Garðar er húsasmiðameistari og sér um viðhaldsmál hjá Byggingafélagi námsmanna. Þessir tveir menn hafa því yfirgripsmikla þekkingu á viðhaldsmálum húsa og búa báðir í íbúðum Búmanna.

Garðar og Stefán voru kjörnir með öllum greiddum atkvæðum til þriggja ára.

________________________________________________________________________________

Tillaga að breyttum samþykktum félagsins lögð fram á aðalfundi Búmanna 2010

Undir liðnum “ Ákvæði til bráðabirgða” aftast í samþykktunum komi eftirfarandi ákvæði:

Stjórn Búmanna getur ákveðið við erfiðar markaðs- og rekstraraðstæður að fresta kaupskyldu félagsins á búseturétti um óákveðinn tíma til að tryggja rekstrarhæfi félagsins og öryggi félagsmanna. Stjórn Búmanna hsf. setji nánari reglur um fyrirkomulag.

Tillaganan var samþykkt með öllum greiddum atkvæðum til eins árs og skal takast til umræðu og endurskoðunar á næsta ársfundi félagsins 2011.

______________________________________________________________________________________

Viðurkenning Sjálfsbjargar landsambandi fatlaðra fyrir gott aðgengi 3. desember 2009.

Búmenn fengu viðurkenningu Sjálfsbjargar landsambandi fatlaðra fyrir gott aðgengi 3. desember 2009, sem er alþjóðadagur fatlaðra. Búmenn eru fyrstir til að hljóta þessa viðurkenninguna fyrir íbúðir. Til þessa hefur viðurkenningin aðallega verið veitt opinberum stofnunum.

Viðurkenningin hljóðar svo: Húsnæðisfélagið Búmenn hlýtur viðurkenningu Sjálfsbjargar lsf. fyrir góða og framsýna hönnun með tilliti til aðgengis hreyfihamlaðra.

_______________________________________________________________________________________

Greiðslujöfnun kemur til framkvæmda 1. janúar 2010.

Stjórn Íbúðalánasjóðs hefur samþykkt umsókn Búmanna um greiðslujöfnun lána og er nú unnið hörðum höndum að því að gera nauðsynlegar breytingar vegna þessa. Breytingin kemur til framkvæmda um áramótin. 17.12.09

________________________________________________________________________________________

Reykjavík 18. nóvember 2009

Efni:   Búmenn hafa sótt um greiðslujöfnun lána vegna íbúða félagsins.

Samkvæmt nýjum lögum um greiðslujöfnun lána stendur húsnæðissamvinnufélögum til boða að sækja um greiðslujöfnun. Það er stjórn Íbúðalánasjóðs sem getur tekið ákvörðun um að heimila greiðslujöfnun til Búmanna.

Stjórn Búmanna hefur ákveðið að sækja um greiðslujöfnun vegna lána til Íbúðalánasjóðs og hefur slík umsókn þegar verið send.

Greiðslujöfnun hefur bæði kosti og galla. Greitt verður samkvæmt greiðslujöfnunarvísitölu en lánin fylgja áfram neysluvísitölu. Í grundvallaratriðum er verið að færa greiðslubyrði lána frá nútímanum til framtíðar. Verið er að létta greiðslubyrðina nú og næstu misseri vegna erfiðs ástands í þjóðfélaginu.

Í raun er ákveðinni fjárhæð mánaðargjaldanna frestað til seinni tíma og mun Íbúðalánasjóður halda utan um þessa fjárhæð á sérstökum greiðslujöfnunarreikningi sem tengist hverju og einu láni. Þegar launakjör og atvinnustig fer upp aftur þá hækkar greiðslujöfnunarvísitalan og þá hækka afborganir lána aftur.  Með hækkandi greiðslujöfnunarvísitölu fer fólk að greiða niður það sem safnast hefur inn á greiðslujöfnunarreikninginn. Við hækkandi greiðslujöfnunarvísitölu er fólk væntanlega betur í stakk búið til að greiða meira vegna þess að kaupmáttur hefur aukist aftur.

Eitt af markmiðum Búmanna hefur verið að reyna að lágmarka húsnæðiskostnað íbúa til lengri- og skemmri tíma. Þetta hefur m.a. verið gert með því að öll lán félagsins  eru tekin til eins langs tíma og mögulegt er eða til 50 ára. Fyrir búseturétthafa Búmanna sem flestir eru komnir vel yfir fimmtugt er það meira atriði að hafa þægileg mánaðargjöld heldur en að lánin greiðist fyrr niður. Almenningi gefst að hámarki kostur á því að taka lán til 40 ára.

Áhrif greiðslujöfnunarinnar verða þau að sú fjárhæð sem fer inn á greiðslujöfnunarreikninginn ber einnig vexti og verðbætur sem greiða þarf í framtíðinni.

Það er mat starfsmanna Búmanna að mikill meirihluti búseturétthafa Búmanna vilji að félagið nýti sér greiðslujöfnunina sem mun auðvelda mörgum að ná endum saman á þessum erfiðu tímum.

Eins og fram kemur hér að framan þá hefur félagið sótt um að fá greiðslujöfnun og hefur verið tekið jákvætt í málaleitan félagsins. Væntanlega kemur breytingin til framkvæmda um áramótin.

Varðandi reglur um fyrirhugaða lækkun á greiðslubyrði lána.

Búmenn hafa óskað eftir því við Árna Pál Árnason félagsmálaráðherra að fyrirhugaðar reglur um lækkun á greiðslubyrði lána nái einnig til þeirra sem búa í íbúðum félagsins. Af fyrstu viðbrögðum úr ráðuneytinu og frá Íbúðalánasjóði er ástæða til bjartsýni. 14. okóber 2009.

Ný lög um greiðslujöfnun lána nr. 50/2009.

Í lögunum er stjórn Íbúðalánsjóðs veitt heild til að láta greiðslujöfnunina einnig ná til húsnæðisfélaga eins og Búmanna. Búmenn sendu stjórn Íbúðalánsjóðs umsókn dags. 29. október þar sem Búmanna óska eftir því að greiðslujöfnunin nái einnig til lána sem félagið hefur tekið hjá sjóðnum.  Ekki hafa borist svör við því hvenær búst megi við því að greiðslujöfnunin hefjist.