Fréttir

Fréttir og fréttamolar

Hér fyrir neðan eru nokkrar fréttir af starfsemi Búmanna. Hægt er að nálgast síðasta fréttabréf Búmanna í heild sinni á síðunni Skjöl.

Gjaldskrá Búmanna 1. ágúst 2011

Stofngjöld og félagsgjöld eru kr. 2.000 á ári fyrir einstaklinga og kr. 3.000 fyrir hjón.

Þjónustugjald til félagsins af íbúðum félagsmanna er kr. 4.000 á mánuði.

Staðfestingagjald vegna kaupa og sölu á búseturétti í íbúðum félagsins er kr. 60.000.-

Þóknun vegna söl búseturéttar í frjálsu kerfi er kr. 80.000.-

Úttektaragjald við skil á íbúðum félagsins er kr. 17.000.-

Greiðslujöfnunarvísitala hækkar

Þann 1. ágúst hækkaði greiðslujöfnunarvísitala um 4.6% á milli mánaða sem hefur bein áhrif til hækkunar á afborgunum lána á íbúðum Búmanna.

Hækkun Þjónustugjalds

Ákveðið var á stjórnarfundi Búmanna 6. júlí s.l. að hækka þjónustugjald á íbúðum félagsins. Þjónustugjald hækkar 1. ágúst í kr. 4.000.-. Gjaldið hefur verið kr. 2.000.- frá stofnun félagsins eða samtals í 12. ár.

Aðalfundur Búmanna 2011

Aðalfundur Búmanna sem haldinn var á Grand Hótel Reykjavík fimmtudaginn 9. júní kl. 17.00.

Fundarsetning:

Góðir félagar. Ég býð ykkur öll velkomin á þennan aðalfund félagsins okkar.

Áður en við göngum til hefðbundinna aðalfundarstarfa viljum við fá að bjóða gest fundarins velkominn, sem að þessu sinni er Sigríði Ingibjörg Ingadóttir alþingismaður. Sigríður er m.a. formaður félags- og tryggingamálanefndar og formaður samráðshóps um húsnæðisstefnu sem skilaði velferðarráðherra tillögum að viðamiklum breytingum á ýmsu er lítur að húsnæðismálum í lok apríl s.l.

Við ætlum að biðja Sigríði að upplýsa okkur í stuttu máli hvað felst í áðurnefndum tillögum um húsnæðismál.

Skýrsla formanns

Á starfsárinu júní 2010- júní 2011 var stjórn félagsins þannig skipuð:

formaður: Guðrún Jónsdóttir

varaformaður: Steinunn Finnbogadóttir

aðrir stjórnarmenn Úlfur Sigurmundsson

Sigurveig Sigurðardóttir

Ásgeir Hjálmarsson

varamenn: Eyrún Eiríksdóttir

Helgi Baldursson

Þorsteinn Ragnarsson

Skoðunarmenn félagsins voru: Ármann Pétursson og Sigurður Þórhallsson og skoðunarmenn til vara voru Sigurður Walters og Emil Gunnar Guðmundsson.

Stjórnin hélt 19 bókaðan fund á starfsárinu auk fjölda vinnufunda og óformlegra smærri funda.

Starfsmannamál.

Það var engin breyting á starfsfólki félagsins á árinu Hjá félaginu starfa nú þau Daníel Hafsteinsson, Guðmundur Guðbjartsson, Lára Guðmundsdóttir og Þorgrímur Stefánsson.

Félagsdeildir Búmanna.

Um síðustu áramót voru 2.122 félagsmenn í Búmönnum en þá voru félagsnúmer komin í 4709. En eins og kunnugt er þá falla þau númer dauð niður þegar félagsmenn hætta í félaginu eða ef þeir falla frá.

Búmenn eru deildaskipt félag og eru nú starfandi 10 félagsdeildir og tilheyra í dag rúmlega 90% félagsmanna einhverri af þessum deildum.

Reykjavíkurdeildin er stærsta deildin með 736 félaga. Næst kemur Suðurnesjadeild með 357 félagsmenn, Eyjafjarðardeild með 216 félagsmenn og Kópavogsdeild með 204 félagsmenn.

Byggingaáætlun.

Félagið hefur frá upphafi lagt fram byggingaráætlun, sem hefur verið grunnur að lánsumsókn til Íbúðarlánasjóðs. Bygingaráætlunin hefur verið endurskoðuð

á hverju ári. Ekki er gert ráð fyrir að íbúðum fjölgi fram að næsta aðalfundi. Frá því að við vorum hér síðast fyrir ári síðan hefur íbúðum félagsins aðeins fjölgað um 8 sem er minnsta fjölgun íbúða á vegum félagsins frá upphafi.

Búmenn eiga kauprétt í 17 íbúðir sem nú eru í lokafrágangi við Smyrlaheiði í Hveragerði. Það er Íslandsbanki sem er eigandi íbúðanna í dag. Fyrir eiga Búmenn 26 íbúðir á lóðinni. Til gamans má geta þess að á þessu ári hafa Búmenn selt búseturétt í 4 íbúðum við Smyrlaheiði og er mikill áhugi á íbúðunum. Hér finnum við fyrir mikilli breytingu vegna þess að ekkert seldist árið 2009 og 2010.

Búmenn hafa verið í samskiptum við Reykjavíkurborg um nokkuð langt skeið varðandi lóð við Skógarveg í Fossvogi. Á lóðinni er gert er ráð fyrir húsi fyrir um 20 íbúðir. Við teljum að það sé áhugi hjá félagsmönnum ef við næðum hagstæðum samningum um bygingu á þessum stað. Við vitum að það eru aðrir aðilar að reyna að ná lóðinni til sín.

Við teljum að nú sé komið að okkur að fá úthlutað góðri lóð nær miðju borgarinnar sem ekki er á uppsprengdu verði. Við vitum einnig að frá því að lóðarúthlutun liggur fyrir, þá tekur sinn tíma að láta teikna hús, semja við verktaka, auglýsa og kanna áhuga félagsmanna. Eitt ár er fljótt að líða í þessu sambandi en við verðum að horfa til framtíðar.

Ekki má gleima því að við eigum verkefni uppi í hillu sem voru komin langt í undirbúningi fyrir hrun. Þó að við höldum að okkur höndum nú þá er ástæða til að nefna nokkur verkefni sem voru komin vel á veg fyrir hrun.

Búmenn hafa unnið að skipulagi á Akureyri á reit fyrir um 30 íbúðir í sérbýli við Krossanesbraut.

Einnig hefur verið unnið að skipulagi á reit við Víðihlíð í Grindavík þar sem áætlað er að hægt verði að byggja um 40 íbúðir.

Búmenn hafa einnig unnið með Kaþólsku kirkjunni sem á lóð við Jófríðarstaði í Hafnafirði að frumtillögum að þjónustumiðstöð og íbúðum.

Einnig hafa Búmenn komið að skipulagi á reit við dvalarheimilið Kirkjuhvol á Hvolsvelli.

Íbúðamarkaður í mikilli lægð

Eitt af því sem Búmenn hafa haft í heiðri frá upphafi er að miða stærðir íbúða félagsins við viðmiðunarstærðir Íbúðalánasjóðs. Nefna má að samkvæmt þessu má 3ja herbergja íbúð vera 90 fm, 4ra herbergja 105 fm og 5 herbergja má vera 120 fm. Samhliða þessum stærðum gefur sjóðurinn upp viðmiðunarverð íbúða af áðurnefndum stærðum sem tekið er mið af varðandi hámarkslán sjóðsins.

Í uppsveiflunni á íbúðamarkaði sem fór að draga verulega úr árið 2007 og sem lauk formlega með bankahruninu hafði þróunin verið þannig að íbúðir fóru sífellt stækkandi. Stór hluti af þeim íbúðum sem byggðar voru undir lokin og standa jafnvel auðar eru þessar svokölluðu uppsveifluíbúðir. Hér voru 3ja herbergja íbúðir ekki 90 fm, heldur 110 eða stærri.

Þegar hjón standa frammi fyrir því að þurfa þriggja herbergja íbúð og fermetraverð er kr. 250.000 þá er himin og haf á milli þess hvort íbúðin er 90, 110 eða jafnvel stærri.

Stærri íbúðin kostar þá 27.5 millj. og sú minni 22.5 mill. ef búseturétturinn er 20% þá eru mánaðargjöldin í þeirri stærri kr. 132.000 en einungis um 99.000 í þeirri minni.

Þegar harðnar á dalnum eins og gerst hefur hér á landi eftir hrun þá er augljóst að sá sem stendur frammi fyrir því að fá svipað notagildi af þessum tveimur 3ja herbergja íbúðum þá segir það sig sjálft að flestir velja ódýrari kostinn. Alveg frá upphafi hafa Búmenn reynt að hafa það í huga að íbúðir félagsins væru þannig úr garði gerðar að þær væru samkeppnishæfar við aðrar íbúðir á markaðnum.

Hérna erum við kannski komin að kjarna málsins. Við heyrum oft þegar fólk er að spá í okkar íbúðir og okkar kerfi að fólk er að bera saman verð og gæði og velta fyrir sér kostum þess að vera í Búmönnum. Þá segja margir, ef ég keypti svona íbúð sjálfur að þá væri þetta svona og hinsegin...........

En málið er bara þannig að við höfum haf áhrift á teikningar húsanna frá upphafi. Við reynum að tryggja að öll aðgengismál séu í lagi. Íbúðirnar eru einfaldlega sérsniðnar fyrir okkur og eru í raun nánast ekki til á hinum frjálsa markaði.

Sem dæmi:

það er ekki mikið um 90 fm. íbúðir með aðgangi að samkomuhúsi.

Eða 90 fm sérhæð, raðhús eða parhús eru heldur ekki á hverju strái.

Réttar stærðir ásamt því að Búmenn hafa náð að semja kaupverð íbúða niður vegna magnkaupa gerir það að verkum að íbúðir Búmanna verða alltaf samkeppnishæfari en aðrar íbúðir á markaðnum.

Byggingaverktakar vilja helst byggja stærri íbúðir vegna þess að það er meira upp úr því að hafa fyrir þá. Þeirra hugsun er að grunnkostnaðurinn er kominn í íbúðina. Það þarf baðherbergi, eldhús o.s.frv. og þeir líta svo á að allir aukafermetrar sem þeir ná til viðbótar séu bara bónus fyrir þá.

Bónusinn fyrir okkur er að fá góðar íbúiðir og nauðsynleg rými, eða sagt með öðrum orðum að fá sem mest kjöt á beinin á sem hagkvæmustu verði.

Á síðasta ári gerðu Búmenn tilraun í samstarfi við bankastofnun um að markaðssetja íbúðir. Gerður var samningur við bankann þar sem segja má að Búmenn hafi bæði verið með axlabönd og belti. Samið var um verð íbúða og síðan auglýstu Búmenn. Í samkomulaginu var gert ráð fyrir því að við sölu búseturéttur þá fyrst kæmi til þess að Búmenn festu kaup á viðkomandi íbúð. Um var að ræða vandað hús sem staðsett er í Mosfellsbæ sem hentaði Búmönnum vel nema að íbúðirnar voru stórar.

Okkur tókst að semja verðlagningu verulega niður. Eftir að reynt hafði verið að markaðssetja íbúðirnar í 6 mánuði án árangurs var sölutilraunum hætt.

Það er mat okkar að óvissan í samfélaginu, umræður um lækkandi verð og stærðir íbúðanna hafi ráðið úrslitum. Í þessu húsi var þriggja herbergja íbúð 115 fm í stað 90 fm.

Erfiðleikar á íbúðamarkaði

Niðursveifla á íbúðamarkaði hófst fyrrihluta árs 2007 þrátt fyrir að stóra höggið hafi komið við bankahrunið. Við höfum því mátt þola fimm mögur ár um þessar mundir. Það þarf ekki að taka fram að þetta hefur verið erfiður tími fyrir félagið okkar og fyrir marga af okkar félagsmönnum. Búmenn hafa þurft að leysa til sín töluvert af íbúðum vegna þeirra búsetusamninga sem tilheyra kaupskyldunni og síðan þurft að greiða mánaðargjöld af auðum íbúðum. Þetta höfum við getað vegna þess að okkur tókst að mynda varasjóð í þessum tilgangi áður en niðursveiflan hófst.

Við verðum ennþá vör við að búseturétthafa sem eru í erfiðleikum, bæði með mánaðargjöldin og með að selja búseturétti.

Við viljum benda fólki á að það er hægt að framleigja íbúð í eitt ár í senn ef búseturéttur selst ekki. Sækja þarf formlega um og fylgja ákveðnum reglum, en slíkri umsókn hefur aldrei verið hafnað. Þetta getur til dæmis verið leið fyrir þá sem eiga íbúðir í nýja kerfinu þ.e. búseturéttur með frjálsri sölu vegna tímabundinna erfiðleika við sölu á búseturéttinum.

Búmenn fengu greiðslujöfnun á lán félagsins í upphafi árs 2010. Greiðslujöfnun hefur bæði kosti og galla. Greitt er af lánunum samkvæmt greiðslujöfnunarvísitölu en lánin fylgja áfram neysluvísitölu. Í grundvallaratriðum er verið að færa greiðslubyrði lána frá nútímanum til framtíðar. Verið er að létta greiðslubyrðina nú og næstu misseri vegna erfiðs ástands í þjóðfélaginu.

Þegar launakjör og atvinnustig fara aftur upp, þá hækkar greiðslujöfnunarvísitalan, og þá hækka afborganir lána aftur. Með hækkandi greiðslujöfnunarvísitölu fer fólk að greiða niður það sem frestaðist vegna fyrirkomulagsins og er fólk væntanlega betur í stakk búið til að greiða meira vegna hækkandi kaupmáttar.

Ekki bætti úr skák að hálfgert upplausnarástand myndaðist í Íbúðalánasjóði á miðju síðasta ári þegar Guðmundur Bjarnason hætti störfum hjá sjóðnum og það dróst til loka árs að ráða nýjan framkvæmdastjóra. Við höfum átt mjög gott samstarf við Sigurð Erlingsson nýjan framkvæmdastjóra Íbúðalánasjóðs síðan hann tók við. Mikil endurskipulagning hefur staðið yfir á undanförnum mánuðum hjá sjóðnum vegna ástandsins. Við erum mjög bjartsýn á að ráðamenn þjóðarinnar muni vinna náið með Íbúðalánasjóði að nauðsynlegum aðgerðum á húsnæðismarkaðnum.

Ég verð þó að segja að ráðamenn hafa ekki gefið mikið færi á sér varðandi málefni húsnæðisfélaganna þrátt fyrir ýmsar yfirlýsingar.

Nóg er að nefna yfirlýsingu ríkisstjórnarinnar frá 17. mars 2010 þar sem m.a. kom fram að til stæði að leggja sérstaka áherslu á varanlega leigu- og búseturéttarkosti og gera þau að raunhæfum langtímavalkosti við séreignarformið.

Í yfirlýsingunni var talað um stóreflt búseturéttarkerfi, lán vegna kaupa á búseturétti o.fl.

Því miður höfum við séð lítið af aðgerðum í þessa veru ennþá. Við náðum fundi með Árna Páli félagsmálaráðherra í ágúst í fyrra, eftir langa bið. Hann tók hann vel í þær hugmyndir sem við lögðum fyrir hann. Tveimur vikum síðar var hann farinn úr ráðuneytinu.

Guðbjartur Hannesson sem tók við af Árna Páli hefur ekki ennþá hleypt okkur að sér - þrátt fyrir mikla eftirfylgni. Hann beitti sér fyrir að settur var á laggirnar samráðshópur um húsnæðisstefnu sem var að skila af sér núna á dögunum. Hópurinn samanstóð af embættismönnum, fulltrúum stéttarfélaga og atvinnurekenda.

Við áttum fundi með Sigríði Ingibjörgu Ingadóttur formanni starfshópsins, sem fór yfir helstu niðurstöður hér áðan, þar sem okkur gafst tækifæri til að koma á framfæri okkar hugmyndum.

Megin niðurstaða vinnuhópsins er að breyta vaxtabóta og húsaleigubótakerfinu yfir í kerfi svokallaðra húsnæðisbóta. Þessum húsnæðisbótum er ætlað að jafna húsnæðiskostnað sama hvort fólk búi í eigið húsnæði, búseturéttaríbúð eða leiguíbúð. Fram hefur komið að þannig verði bótunum skipt með öðrum hætti. Þannig að minna muni koma í hlut þeirra sem skulda mikið í eigin húsnæði og meira til þeirra sem leigja.

Við skulum trúa því að þessi breyting sem fyrirhugað er að komi í einhverjum þrepum á næstu árum og gagnist okkur betur en vaxtabætur.

Einnig kemur fram í tillögum vinnuhópsins að ríkið leiti leiða til að efla markað með langtímaleiguhúsnæði og fjölga íbúðum með búseturétti.

Við fengum fund með Ögmundi Jónassyni innanríkisráðherra um miðjan janúar. Ögmundur tók vel á móti okkur og sýndi okkar málum mikinn áhuga sem m.a. fólst í því að hann kallaði eftir minnisblaði um okkar tillögur og áhersluatriði, sem hann vildi síðan ræða betur við okkur innan hálfs mánaðar. Okkur hefur ekki tekist að fá fund með honum aftur.

Nýlega bauðst okkur að gera umsögn um lagafrumvarp um hina svokölluðu 110% leið, sem felst í því að færa lán yfirskuldsettra íbúða niður í 110% af fasteignamati eða verðmati íbúðar. Það sem gerðist við hrunið var að fasteignir lækkuðu töluvert á meðan lánin ruku upp vegna mikillar verðbólgu.

Í umsögn okkar lögðum til að 110% leiðin ætti einnig að ná til þeirra sem eru í búseturéttaríbúðum. Félags- og tryggingamálanefnd gat ekki fallist á það þar sem tilgangur frumvarpsins var að aðstoða fólk sem komið var með yfirveðsettar eignir og stefndi í gjaldþrot.

Þetta á ekki við um húsnæðissamvinnufélög þar sem íbúðirnar og lánin sem hvíla á þeim eru skráð á félagið en ekki búseturétthafana og því geti þeir sem skráðir eru búseturétthafar ekki orðið gjaldþróta vegan lánanna.

Í nefndaráliti frá nefndinni kemur eftirfarandi fram:

Í ljósi þeirra athugasemda sem komið hafa fram og sérstöðu húsnæðissamvinnufélaga beinir meirihluti félags- og tryggingamálanefndar þeim tilmælum til velferðarráðuneytis að það hraði þessari vinnu og telji jafnframt mikilvægt að skoðaðar verði allar leiðir í þessu efni, m.a. hvort unnt sé að beita sambærilegum reglum og í fyrirliggjandi frumvarpi á lán húsnæðissamvinnufélaga. Í ljósi sérstöðu húsnæðissamvinnufélaganna og mikilvægis þeirra fyrir fjölbreytni á húsnæðismarkaði mun meirihlutinn leggja áherslu á að fylgja málinu eftir og óska eftir fundi með ráðuneytinu hið fyrsta um málefni þeirra.

Það má geta þess að þessi leið þ.e. að færa lánin niður í 110% af fasteignamati eða verðmati er m.a. sú leið sem við höfum rætt við Íbúðalánasjóð. Þannig að við höldum enn í þá von að hægt verði að fara þessa leið varðandi okkar lán.

Þetta gæti komið Búmönnum til góða sérstaklega í nýjum íbúðum félagsins, en eins og kunnugt er hefur fasteignamat íbúða farið lækkandi á undanförnum árum.

Við teljum okkur sjá ákveðin batamerki á undanförnum mánuðum. Á síðast ári seldust búseturéttir í alls 30 íbúðum á vegum félagsins. Nítjá tilheyrðu kaupskyldukerfinu en 11 frjálsri sölu. Þarna erum við að tala um sölu á búseturétti á milli félagsmanna. Um þessar mundir hafa hins vegar selst 26 íbúðir sem sýnir svo ekki verður um villst að Eyjólfur er að hressast.

Samstarf Búmanna og Sveitarfélagsins Álftaness.

Í upphafi árs 2010 stöðvaði fjárhaldsstjórn Álftaness framkvæmdir Búmanna við þjónustumiðstöð á Álftanesi sem byggðu á samningum milli þessara aðila. Leit sveitarfélagið svo á að af þeirra hálfu væri kominn upp forsendubrestur vegna erfiðrar fjárhagsstöðu sveitarfélagsins og vegna þrenginga í efnahagslífinu almennt. Á fundi aðila í lok júlí 2010 lýsti fjárhaldsstjórnin sig reiðubúin til samningaviðræðna við Búmenn um að gera upp tjón Búmanna á grunvelli svokallaðra vangildisbóta. Þannig verði Búmönnum bættur raunkostnaður sem fallið hefur til í bókum félagsins vegna verkefnisins.

Í lok mars s.l. kom tilboða frá fjárhaldsstjór þar sem Búmönnum voru boðnar bætur sem námu um helmingi af þeim kröfum sem Búmenn höfðu sett fram. Eftir að hafa skoðað málið frá ýmsum hliðum með lögmönnum félagsins ákvað stjórn félagsins að taka tilboðinu. Nú er unnið að því að ljúka málinu og detta þá allar skuldbindingar niður milli aðila málsins.

Góðir Fundarmenn.

Ég hef nú farið yfir það helsta, sem verið hefur á borði stjórnar á þessu starfsári. Sem betur fer hefur aldrei hrykt í stjórnarsamstarfinu hjá Búmönnum. Stjórn og starfsmenn hafa samhent unnið að málefnum félagsins á þessu ári sem endranær með hagsmuni félagsmanna að leiðarljósi.

Samstaðan er dýrmæt ekki síst þegar verkefnin eru flókin.

Ég vil sérstaklega þakka meðstjórnendum og starfsfólki félagsins fyrir samstarfið á árinu.

Ykkur kæru félagar er einnig þakkað og ég veit að við trúum öll á bjarta framtíð fyrir félagið okkar og stjörnu fyrir stafni.

Guðrún Jónsdóttir.

____________________________________________________________________________________

Eftirfarandi breyting á samþykktum Búmanna var samþykkt til eins árs:

Stjórn Búmanna getur ákveðið við erfiðar markaðs- og rekstraraðstæður að fresta kaupskyldu félagsins á búseturétti um óákveðinn tíma til að tryggja rekstrarhæfi félagsins og öryggi félagsmanna. Stjórn Búmanna hsf. setji nánari reglur um fyrirkomulag.

Samþykkt var að hækka staðfestingagjald úr kr. 40.000.- í kr. 60.000.-

_____________________________________________________________________________________

Skýrsla Viðhaldsráðs Búmanna.

Aðalfundur Búmanna 9. júní 2011.

Um síðustu áramót voru kr. 156.4 millj. í viðhaldssjóðum Búmanna.

Á árinu 2010 voru greiddar kr. 21.6 millj. úr viðhaldssjóðum félagsins.

Greiddar voru kr. 30.6 millj. inn í sjóðina.

Viðhaldssjóðirnir eru vistaðir á svokölluðum markaðsreikningum bankanna. Samtals voru greiddar kr. 5.2 millj í vexti.

Eins og flestir vita þá var lengi vel hægt að fá endurgreiddan 60% hluta af virðisaukaskatti af vinnu manna á verkstað. Þessu var breytt í mars árið 2009 og hefur síðan verið hægt að fá endurgreiddan allan virðisauka af vinnu manna á verkstað frá þeim tíma.

Bókhaldsstofa Búmanna sér um að sækja um endurgreiðslurnar og hefur verið tekið upp það verklag að virðisaukaskattur sem tilheyrir árinu 2010 skilar sér til baka til viðkomandi búsetufélaga árið eftir og svo koll af kolli.

Ráðið útbjó yfirlit yfir það sem tilheyrir viðhaldsjóði Búmanna sem kemst fyrir á einu A4 blaði og stendur til að koma því í allar íbúðir Búmanna.

Viðhaldsráðið hefur lagt til við stjórn Búmanna að vegna ástandsins í þjóðfélaginu verði framlagið óbreytt og hefur stjórn Búmanna fallist á það.

Viðhaldsráð leggur til að viðhaldsprósenta verði sú sama frá næstu áramótum og samþykkt var á aðalfundi Búmanna 11. júní 2008, þ.e:

Lágmarksgjald í viðhaldssjóð verði 0,5% af brúnabótamati íbúðar þar til lágmarksfjárhæð á hverja íbúð í viðkomandi búsetufélagi nær kr. 150.000.-

Eftir að þessari fjárhæð er náð þ.e. 150.000.- getur greiðsla í viðhaldssjóð lækkað niður í 0,35% af brunabótamati íbúðar.

Þetta mun vera fjórða árið í röð þar sem framlagið í viðhaldssjóð hefur ekki verið hækkað. Þá erum við að tala um rukkað er sömu krónutölu og ekki hefur verið leiðrétt fyrir verðbólgu. Viðhaldsráðið telur að þetta sé réttlætanleg vegna ástandsins í þjóðfélaginu.

Við erum í raun komin undir 0,35% af brúnabótamati þar sem framlagið hefur ekki verið leiðrétt fyrir verðbólguáhrifum í nokkur ár.

Við teljum ekki hægt að fara neðar en við gerum í dag. Rannsóknastofnun byggingariðnaðarins telur eðlilegt að taka 1-2%. Við vitum að Búseti tekur 0,8% sem er helmingi meira en við tökum.

Það er ekki útilokað að Íbúðalánasjóður sem er helsti lánveitandi félagsins geti gert kröfu um að við hækkum framlagið.

Daníel Hafsteinsson

Betri heimasíða

Þessa dagana erum við að uppfæra heimasíðuna okkar. Áætlað er þeirri vinnu verði að mestu lokið í enda janúar. 7. janúar 2011

Orkuveitu Reykjavíkur hækkar orku veruleg

Í Þann 1. október hækkaði rafmagn og hiti um 35% og haf þeir sem greiða sjálfir rafmagn og hita fundið fyrir því. Nú 1. janúar munu Búmenn laga mánaðargjöldin hjá þeim búsetufélögum sem greiða orku í gegnum mánaðargjöld félagsins. Leiðréttingin kemur fram undir liðnum "rekstur húsfélags" á mánaðargjaldaseðlinum. 12. desember 2010.

Grein um Smyrlaheiði í Hveragerði

Í 2. tbl 1. árgangs Lands og sögu, sem er tímarit á sviði byggingaiðnaðar, fasteigna og arkitektúrs. Er að finna grein um starfsemi Búmanna í Hveragerði. Smelltu >hér< til að lesa greinina. 11 desember 2010

Mánaðargjöld Búmanna

Vegna greiðslujöfnunar lána Búmanna þá fylgja lánin nú greiðslujöfnunarvísitölu í stað neysluvísitölu. Undanfarna mánuði hefur greiðslujöfnunarvísitala breyst lítið. Nú ber hins vegar til að hún hækkar úr 97,6 stigum í júlí í 101 stig í september. Af þessum orsökum hækkar sá liður mánaðargjaldanna sem kallast afborgun lána nokkuð.

[ Forsíða ] [ Efnisyfirlit ] [ Eldri auglýsingar ] [ Lausar íbúðir ]

Vefhönnun: Verkefni.com